Movie Flash Magazine, May
1, 2003 Issue
Katawang Kano, Pusong Pinoy
Si Larry Marshall, (kilala bilang “Katawang Kano,
Pusong Pinoy”) na isa sa pinakabagong recording artist ng Viva Records
ay isang purong Amerikano na nagdesisyong iwanan ang bansang kinalakihan
upang dito ipagpatuloy ang kanyang propesyon sa pagkanta.
Natutunan niyang magtagalog sa pamamagitan ng sariling
sikap. Pati na ang ating heograpiya, tradisyon at paniniwala ay kaniya ring
pinag-aralan. Naging hamon sa kaniya ang kanyang hilig sa musika upang
maibahagi ang kanyang talento sa pamamagitan ng pag-awit sa Tagalog.
Hindi naman siya nabigo sapagkat buong puso siyang
tinangkilik ng mga kakabayan nating Pinoy sa Chicago at California. Sa loob
ng sampung taon, nakilala siya bilang isang mahusay na singer doon.
Katunayan, nakasama na niya sina Jose Mari Chan, Hajji Alejandro, Carol
Banawa, Jun Polistico, Nonoy Zuniga at Jocelyn Enriquez. Hindi matatawaran
ang kasiyahang naibigay niya sa mga Pinoy audience dahil sa tuwina’y Tagalog
ang kanyang kinakanta.
Ang kanyang album na pinamagatang “Ikaw Ang Dahilan” ay
naipalabas sa States ng KKPP Productions Inc. noong May 2002. Dahil sa
taglay niyang husay at karisma, pagdating niya ng Pilipinas, agad siyang
binigyan ng pagkakataon ng Viva Records. Inilabas ang kanyang album dito
noong Pebrero 2003 na naglalaman ng labindalawang Tagalog songs na sinulat
ng mga magagaling na kompositor na sina Vehnee Saturno at Jimmy Borja.
Matatas din magsalita ng Tagalog si Larry na animo’y dito
lumaki at nagkaisip gayung purong Amerikano siya. Hindi naman iyon
maitatatwa ng kanyang pisikal na anyo. 6’2” ang taas, katawang halatang
alaga sa ehersisyo, blonde ang buhok, at asul ang kanyang mga mata.
Si Larry ay nasa pangangalaga ngayon ni June Torrejon
Rufino na siya ring manager nina Assunta de Rossi, Edu Manzano, Joel Torre
at ng boy band na Jeremiah.
Masarap isipin na may isang Larry Marshall na hindi
nangingiming ihayag at ipakita sa lahat na mahal niya ang Pilipinas.
“Pakiramdam ko Pilipino talaga ako”, masayang pahayag ni Larry. Sa kanyang
ngiti at ningning ng kanyang asul na mga mata, parang ipinapaalala niya sa
ating lahat kung gaano kasarap maging isang tunay na Pilipino sa isip at
puso.
Para sa mga karagdagang impormasyon tungkol kay Larry,
kailangan lang bisitahin ang kanyang website sa:
www.kkpponline.com.
